Ўзбекистон Республикаси Президентининг 2021-йил 11-февралдаги “Давлат активларини хусусийлаштириш жараёнларини янада жадаллаштириш тўғрисида”ги ПФ–6167-сон Фармонига мувофиқ, “Фарғона нефтни қайта ишлаш заводи” МЧЖ (кейинги ўринларда – “Завод” ёки “ФНҚЗ”) устав капиталидаги 100 фоиз улушни сотишни ташкил этиш ишлари давом этмоқда.
"UzAssets инвестиция компанияси" АЖ (кейинги ўринларда – “UzAssets” ёки “Сотувчи”) веб-сайтида ФНҚЗни сотув жараёнининг бошланиши ва барча манфаатдор томонларни унда иштирок этишга таклиф қилиш тўғрисида 2021-йилнинг 30-апрел санасида эълон чоп этилди.
Хусусийлаштириш бўйича маслаҳатчи - KPMG компанияси томонидан мазкур турдаги битимларни амалга оширишнинг халқаро амалиётига мувофиқ билдирилган тавсиялар ва Заводни ривожлантиришнинг устувор йўналишларини инобатга олган ҳолда, ФНҚЗни сотишнинг икки босқичли жараёни эълон қилинади (кейинги ўринларда – “Битим” ёки “Сотув”).
Қабул қилинган ёндашувга мувофиқ, ФНҚЗни сотиш жараёни қуйидаги босқичлардан иборат бўлади:
1. Битимда иштирок этиш истагини билдириш бўйича аризалар асосида Ошкор этмаслик тўғрисидаги битим тузиш;
2. Мажбурий таклифларни қабул қилиш, музокаралар ва Битим тузиш.
Биринчи босқичда Битимда иштирок этиш истаги билдирилган аризалар асосида Сотувчи томонидан 2021-йил 3-июлгача муддатда Битимнинг 2-босқичига ўтишга рухсат берувчи Ошкор этмаслик тўғрисидаги битимни имзолаш таклиф этилади. Бунда, Битимда иштирок этиш истагини билдириш бўйича 2021-йил 3-июл куни Тошкент вақти билан соат 18:00 га қадар келиб тушган аризалар Сотувчи томонидан қабул қилинади ва кўриб чиқилади.
Ошкор этмаслик тўғрисидаги битим имзоланганидан сўнг, иккинчи босқичда потенциал инвесторлар бир вақтнинг ўзида 2021-йил 6-июлда қўшимча маълумотларни олиш имкониятига эга бўлишади.
Потенциал инвесторлардан қўшимча маълумотни таҳлил қилиш ва олди-сотди шартномаси лойиҳасига тузатишларни ҳамда мажбурий таклифларни 2021-йил 30-августдан кечиктирмасдан тақдим этиш орқали Битимни амалга оширишга тайёрлигини тасдиқлаш сўралади.
Потенциал инвесторлар ўзларининг мажбурий таклифлари билан биргаликда 1-иловада келтириб ўтилган мезонлар бўйича малакавий саралашдан ўтиш учун зарур ва етарли маълумотларни тақдим этишлари лозим.
Қабул қилинган мажбурий таклифлар ва олди-сотди шартномасига тузатишлар асосида, Сотувчи уч ҳафта ичида кейинги босқичда ўтказилиши мумкин бўлган музокаралар босқичига рухсат берилган компаниялар рўйхатини тасдиқлайди. Ғолиб, бошқа омиллар қаторида, нарх таклифи ва келишилган олди-сотди шартларининг энг яхши комбинациясини ҳисобга олган ҳолда аниқланади.
1-Илова. Жараён Иштирокчиларига қўйиладиган малака талаблари
Ушбу талаблар (нарх таклифи ва бошқа тижорат шартларини ўз ичига олган шартлар билан бир қаторда) ғолибни аниқлаш учун мўлжалланган.
Харидор ва / ёки унинг тасисчилари, бенефициарлари, харидорнинг аффилланган компаниялар гуруҳларида нефт маҳсулотларини ишлаб чиқариш ва сотиш соҳасида малакавий тажрибанинг мавжудлиги;
ФНҚЗ устав капиталидаги 100 фоиз улушни сотиб олиш учун пул маблағлари ёки унинг эквивалентида етарли молиявий ресурсларга эга бўлишлик;
потенциал харидорлар Ошкор этмаслик тўғрисидаги битим имзолаганидан кейин танишиши мумкин бўлган 2020-2030-йилларда "Фарғона нефтни қайта ишлаш заводи" МЧЖни ривожлантириш бўйича чора-тадбирлар дастурида кўзда тутилган, Ўзбекистон Республикаси иқтисодиётининг ва бизнеснинг узоқ муддатли ўсишига эришишини кўзлаган Заводни модернизация қилиш дастури доирасида ФНҚЗга инвестиция киритиш имкониятига эга бўлишлик ва тайёр бўлишлик, хусусан, қуйидаги шартларнинг бажарилишини таъминлаш:
Евро-5 талабларига жавоб берадиган замонавий ва экологик тоза бензин ва дизел ёқилғиси ишлаб чиқаришни ташкил этиш;
API (Америка нефт институти) бўйича II ва III гуруҳ базавий ва двигател мойларини, шунингдек А-1 реактив ёқилғисини ишлаб чиқаришни ташкил этиш;
Углеводород газларидан суюлтирилган табиий газ ишлаб чиқаришни кўпайтириш;
Хомашёни қайта ишлаш даражасини 92% гача ошириш;
Мой-блокини модернизация қилиш ва халқаро стандартларга жавоб берадиган мотор мойларини ишлаб чиқаришни йўлга қўйиш;
2030-йилгача ишлаб чиқариш қувватини камида 2 миллион тоннага етказишни таъминлаш;
Битим тузилган санадан 12 ой давомида Компания ходимлар сонини Битимни амалга ошириш санасидаги Компания ходимлари ўртача сонидан келиб чиққан ҳолда бандлик даражасини сақлаб туришга имконият мавжудлиги ва тайёр бўлишлик, иккинчи йилдан бошлаб, ишчилар сонини йилига 20% дан кўп бўлмаган миқдорда оптималлаштиришга тегишли компенсациялар тўланган ҳолда рухсат этилади;
“Жиноий фаолиятдан олинган даромадларни легаллаштиришга, терроризмни молиялаштиришга ва оммавий қирғин қуролини тарқатишни молиялаштиришга қарши курашиш тўғрисида”ги Ўзбекистон Республикасининг 660-ИИ-сонли Қонунига (2019-йил 15-январдаги таҳририда) риоя қилиш.
Қўшимча шартлар
UzAssets сотиш жараёнининг кетма-кетлигини ўзгартириш ёки потенциал харидорга (харидорларга) сотишни ёки сабабларини тушунтирмасдан исталган вақтда улар билан музокара олиб боришни рад этиш ҳуқуқини ўзида сақлаб қолади.
Ушбу эълон ёки унинг мазмунининг бирон бир қисми мазкур эълон чоп этилишидан келиб чиқиб тахмин қилиниши мумкин бўлган UzAssets, Компания ва KPMGнинг Компанияни сотиш билан боғлиқ бирор бир шаклдаги мажбурияти сифатида талқин қилинмаслиги керак. UzAssets ва KPMG (Битим доирасида UzAssetsнинг эксклюзив молиявий маслаҳатчиси вазифасини бажарувчи) ўз хоҳишига кўра ҳар қандай вақтда ва ҳар қандай муносабатда, биргаликдаги ёки шахсий жавобгарликни ўз зиммаларига олмасдан:
(i) аризалар бериш муддатига ўзгартириш киритиш;
(ii) турли хил манфаатдор томонлар учун турли хил тартиб-қоидалар бўйича иш тутиш ва/ёки UzAssets, ФНҚЗ ва KPMG томонидан кўзда тутилган режа жадвал ва тартиб доирасида исталган бошқа потенсиал харидорни (харидорларни) олдиндан огоҳлантирмасдан чиқариб ташлаган ҳолда бир ёки бир нечта потенциал харидорлар билан музокаралар олиб бориш;
(iii) ҳар қандай сабабга кўра сотиш жараёнини тўхтатиш; ва/ёки
(iv) исталган вақтда ва сабабларни тушунтирмасдан Битимга тааллуқли бўлган ҳар қандай потенциал харидор (харидорлар) билан ҳар қандай муҳокама ва музокараларни тугатиш ҳуқуқларини ўзида сақлаб қолади.
(v) жараён ҳақида қўшимча маʼлумот ёки тушунтиришлар олиш учун a.mukhamatkulov@uz-assets.uz, dkalazhanov@kpmg.kz, SSandykbayeva@kpmg.kz ва annakireeva@kpmg.ru электрон почта манзилларига мурожаат қилиш мумкин.
