Жорий йилнинг 16 декабрь куни Давактив агентлигида Ўзбекистон Республикасининг хориждаги дипломатик ва консуллик ваколатхоналари раҳбарлари ҳамда Агентлик вакиллари иштирокида икки ва кўп томонлама ҳамкорлик алоқаларини тизимли йўлга қўйиш юзасидан кенгайтирилган учрашув бўлиб ўтди. Мазкур учрашувда 50 нафардан ортиқ дипломатик ваколатхона раҳбарлари иштирок этди.
Тадбир бошида Давактив агентлиги директори Акмалхон Ортиков сўзга чиқиб, мамлакатимизда хусусийлаштириш ва корпоратив бошқарув соҳасида амалга оширилаётган ислоҳотлар, жумладан, бугунги кунда хусусийлаштириш жараёнлари олдинги даврга нисбатан сезиларли очиқ ва шаффоф тизимга айлантирилганлигини, мазкур жараёнларга халқаро профессионал консалтинг компаниялари жалб қилинаётганлигини таъкидлаб ўтди. Шу билан бирга, А.Ортиков томонидан мамлакатимиздаги хусусийлаштириш жараёнларининг ташқи тарғибот масалаларида камчиликлар мавжудлиги таъкидланди.
Шунингдек, Давактив агентлиги директори ўринбосари Бекзод Усмонов томонидан сўнги йилларда хусусийлаштириш, давлат активларини трансформация қилиш ҳамда давлат корхоналарига замонавий корпоратив бошқарув тизимини жорий этиш бўйича амалга оширилган ишлар ва эришилган натижалар, шунингдек келгусидаги истиқболли режалар тўғрисида тақдимот ўтказилди. Тақдимот давомида, активларни хусусийлаштиришга тайёрлаш жараёнлари “Катта тўртлик” туркумига кирувчи халқаро консалтинг компаниялари томонидан халқаро тан олинган илғор хусусийлаштириш механизми орқали амалга оширилаётганлиги, ҳамда ер участкаларини ажратиш бўйича барча учун тенг, шаффоф ва бозор тамойилларига асосланган тартиб жорий этилаётганлиги айтиб ўтилди.
Шу билан бирга, Давактив агентлиги қошидаги “Электрон онлайн-аукционларни ташкил этиш маркази” ДУК директори Соҳибжон Муродов томонидан учрашув қатнашчиларига “E-auksion” электрон савдо платформасидан фойдаланиш бўйича “мастер-класс” ўтказилиб, чет эл фуқаролари учун савдо платформасида шахсий кабинет очиш, онлайн электрон имзо олиш ва савдоларда қатнашиш учун аризалар бериш тартиблари ҳам назарий, ҳам амалий тушунтирилди.
Ўз навбатида, учрашув давомида мамлакатимизда олиб борилаётган хусусийлаштириш жараёнларида хорижий инвесторларнинг ва ишбилармон доира вакилларининг фаол иштирокини таъминлаш, уларнинг иштирокида оммавий “Roadshow” тақдимотлари, ишчи йиғилишлар ҳамда тренинглар каби тарғибот дастурларини ташкил қилиш, ушбу орқали халқаро жамоатчиликни хабардор қилиш юзасидан мамлакатимизнинг хориждаги дипломатик ва консуллик ваколатхоналари билан ҳамкорлик ва ҳамжиҳатликда фаолият олиб боришга келишилди.
Учрашув якунида иштирокчилар хусусийлаштириш, корпоратив бошқарув соҳасидаги ислоҳотлар ҳамда "E-auksion" электрон-онлайн савдолари билан боғлиқ ўзларининг қизиқтирган барча саволларига жавоб олдилар.
