Тегишли хусусийлаштириш дастурларига мувофиқ, Давлат активларини бошқариш агентлиги томонидан «Навоийазот» АЖни хусусийлаштириш стратегиясини ва уни амалга ошириш йўл харитасини ишлаб чиқиш учун Техник консультант (кейинги ўринларда – Консультант) жалб қилиш юзасидан халқаро танлов эълонига мувофиқ қуйидагилар маълум қилинади.

Мазкур танлов жараёнида 3 та маҳаллий ва халқаро профессионал консалтинг компаниялардан таклифлар қабул қилиниб, уларнинг молиявий таклифи, соҳадаги тажрибаси, малакаси ва белгиланган вазифаларни амалга ошириш бўйича ёндашувлари асосида сараланди.

Саралаш натижасида, фаолият соҳасида амалга оширган юқори даражадаги лойиҳалари, лойиҳа доирасида жалб қилинадиган профессионал жамоасининг малакаси ҳамда энг мақбул нарх таклифини билдирган «Kellogg Brown and Root (KBR)» халқаро компанияси «Навоийазот» АЖни хусусийлаштириш стратегиясини ва уни амалга ошириш йўл харитасини ишлаб чиқиш учун Техник консультант сифатида танланди.

Техник консультант қуйидаги вазифаларни амалга оширади:

• Техник фаолиятини комплекс таҳлили (due diligence)
• Экологик ва ижтимоий фаолиятини комплекс таҳлили (due diligence)
• инвесторлар қизиқишини бирламчи ўрганиш (soft market sounding) доирасида яхлит Компания, шу жумладан эҳтимолий алоҳида мустақил бўлинмаларни ва/ёки ишлаб чиқариш занжирларни ва/ёки инфратузилма ва хизматларини сотиб олишга бўлган инвесторларнинг қизиқишини ўрганиш (primary market sounding)да Етакчи консультантга кўмаклашиш;
• рақобатчилар билан солиштирганда Компания активлари қийматининг рақобатбардошлигини «бенчмаркинг» усулида таққослашда Етакчи консультантга кўмаклашиш;
• хусусийлаштириш (“Навоийазот” АЖ устав капиталидаги давлат ва «Ўзкимёсаноат» АЖ улушларини хусусийлаштириш) стратегиясини ва уни амалга ошириш йўл харитасини ишлаб чиқишда Етакчи консультантга кўмаклашиш.

Давактив агентлиги «Kellogg Brown and Root (KBR)» халқаро компанияси билан биргаликда жараённи очиқ, шаффоф ва рақобат тамойилларига асосланган савдо механизмларига мувофиқ ташкил этишнинг барча чораларини кўради ҳамда жараённинг ҳар бир босқичи тўғрисида оммага ахборот бериб борилишини таъминлайди.

Эслатиб ўтамиз, жорий йил 30 апрелдаги эълонга мувофиқ, “Навоийазот” АЖни хусусийлаштириш стратегиясини ишлаб чиқиш доирасида Халқаро Молия Корпорацияси (IFC) Стратегик маслаҳатчи сифатида жалб этилган.