Ўзбекистон Республикаси Президентининг 2023 йил 24 мартдаги “Иқтисодиётда давлат иштирокини қисқартиришнинг қўшимча чора-тадбирлари тўғрисида”ги ПҚ-102-сонли қарорига мувофиқ, 1001 та корхонадаги давлат акция пакетлари ва 1046 та кўчмас мулк объектлари оммавий савдоларга чиқарилиши, шунингдек, 40 та йирик корхона ва банклардаги давлат улуши барча фуқаролар ва инвесторларга қатнашиш имконияти тақдим этиш мақсадида “битта акция – битта лот” тамойили асосида “халқчил IPO” орқали таклиф этилиши белгиланган.
Ҳудудларда мазкур қарор мазмун-моҳиятини тушинтириш ва тарғибот қилиш ишларини жадаллаштириш мақсадида, жорий йилнинг 9 июнь куни Давлат активларини бошқариш агентлиги томонидан Қашқадарё вилоятида хусусийлаштирилиши белгиланган давлат активлари жумладан, корхоналардаги давлат улушлари, бўш турган давлат мулки объектлари ва сотилиши белгиланган ер участкалари тўғрисида навбатдаги “Roadshow” тақдимоти ўтказилди.
Ушбу тадбирда 300 нафардан зиёд маҳаллий ҳокимликлар ҳамда вилоятдаги йирик корхоналарнинг вакиллари, тадбиркор ва инвесторлар иштирок этди.
“Roadshow” тақдимоти Давлат активларини бошқариш агентлиги директори ўринбосари Бекзод Усмонов, Давлат активларини бошқариш агентлиги вилоят ҳудудий бошқармаси бошлиғи Шерзод Бўриев ҳамда вилоят ҳокимининг ўринбосари Алишер Қодиров бошчилигида бўлиб ўтди.
“Roadshow” иштирокчиларига Давактив агентлиги Қашқадарё вилояти ҳудудий бошқармаси томонидан 2022 йил давомида хусусийлаштириш дастурларига мувофиқ жами 181 та давлат активлари аукцион савдоларига чиқарилганлиги, шундан 29 та давлат активлари 39,9 млрд. сўм қийматга бўлиб-бўлиб тўлаш шарти билан сотилганлиги маълум қилинди. Бундан ташқари, 2022 йил давомида тадбиркорлар ва фуқаролар учун 4590 та 151,9 гектар ер участкалари электрон онлайн-аукцион савдоларига чиқарилган бўлиб, шундан 1211 та 56,4 гектар ер участкалари 27,0 млрд.сўмга сотилишига эришилган.
Шу билан бирга, Ўзбекистон Республикаси Президентининг 2023 йил 24 мартдаги ПҚ-102-сонли қарорига мувофиқ, оммавий савдоларда сотилиши белгиланган Қашқадарё вилоятидаги жами 164 та давлат ва давлат иштирокидаги хўжалик жамиятларининг активлари, шундан 99 та кўчмас мулк объектлари, жумладан, “битта акция – битта лот” тамойили асосида “Минора қуриш экспедицияси” АЖнинг 11,1 фоиз акция пакетлари “халқчил IPO”га чиқарилиши яқиндан таништирилди.
Бундан ташқари, тадбир қатнашчиларига аввалдан доимий фойдаланиш ёки умрбод эгалик қилиш ҳуқуқи асосида ўзларига тегишли бўлган қишлоқ хўжалигига мўлжалланмаган ер участкаларини хусусийлаштириш тартиби бўйича тушунтиришлар берилди.
Ўз ўрнида, Давактив агентлиги мутасаддилари томонидан қатнашчиларга “E-auksion” электрон савдо платформасидан фойдаланиш бўйича “мастер-класс” ўтказилиб, савдо платформасида шахсий кабинет очиш, онлайн электрон имзо олиш ва савдоларда қатнашиш учун аризалар бериш тартиблари ҳам назарий, ҳам амалий тушунтирилди.
Кўтаринки руҳда ва савол-жавобларга бой ўтган “Roadshow” давомида Давактив агентлиги директори ўринбосари Бекзод Усмонов ва вилоятнинг бошқа мутасадди раҳбарлари тадбир қатнашчилари ва ОАВ вакиллари томонидан берилган бир қатор саволларга батафсил жавоблар бериб ўтдилар.
Тадбир якунида, Давактив агентлиги томонидан бир қатор давлат органларининг Қашқадарё вилояти ҳудудий бошқармалари намунали ҳамкор ташкилот сифатида эътироф этилди. Ўз ўрнида, бир қатор туман ҳоким ёрдамчилари давлат активлари соҳасида кўрсатаётган фаолликлари учун ташаккурномалар билан тақдирланди.
Шу билан бирга, куннинг иккинчи ярмида ОАВ вакиллари учун Пресс-тур ҳам ташкил этилиб, давлат активларини сотиб олган тадбиркорлар томонидан ушбу объектлар негизида бажарилган ишлар, шунингдек сотувга чиқарилган давлат активлари жойига чиққан ҳолда ўрганилди.
Шу каби тадбирлар бугунги кунга қадар Фарғона, Андижон, Наманган ва Навоий вилоятларида ўтказилди, шунингдек йил давомида республикамизнинг қолган барча вилоятларида, Тошкент шаҳрида ва Қорақалпоғистон Республикасида ўтказилиши режалаштирилган.
