Жорий йилнинг 16 январь куни Давлат активларини бошқариш агентлиги биносида Давактив агентлиги раҳбарияти ва Германия Федератив Республикасининг Ўзбекистондаги мухтор элчиси Тило Клиннер иштирокида учрашув бўлиб ўтди.
Учрашув мақсади истиқболда белгиланган давлат активларини хусусийлаштириш дастури бўйича фикр алмашиш ва келгуси ҳамкорлик, жумладан, Германия бизнес вакилларини Ўзбекистондаги хусусийлаштириш дастури билан таништириш масалалари муҳокамаси бўлди.
Учрашувда, Давактив агентлиги раҳбарияти томонидан Агентликнинг асосий вазифалари, мазкур йўналишни ислоҳ этиш бўйича қабул қилинган Қонунлар ва тегишли норматив ҳуқуқий ҳужжатлар, хусусийлаштириш дастури ва Германия билан ҳамкорлик алоқалари бўйича маълумот берилди.
Маълумот учун: Агентликнинг Германия билан ҳамкорлик алоқалари узоқ йилларга бориб тақалиб, 2009 йилда Ўзбекистоннинг давлат мулкини бошқариш бўйича ваколатли органи ва Германия Федерал Молия вазирлиги ўртасида илк ҳамкорлик битими имзоланган. Ўтган йиллар давомида, “Акциядорлик жамиятлари ва акциядорларнинг ҳуқуқларини ҳимоя қилиш тўғрисида”ги Қонун, “Давлат мулкини бошқариш тўғрисида”ги Қонун, Корпоратив бошқарув кодекси ҳамкорликда ишлаб чиқилган.
Шу билан бирга, аввал маълум қилинганидек, Германия Молия вазирлиги департаменти директори Андреас Керст 2023 йил октябрь ойида Ўзбекистонга келган ҳамда Давактив агентлиги ходимлари учун амалий семинарлар ташкил этилган.
Шунингдек, учрашув давомида Германиянинг DMT компанияси Дехқонобод калий заводида минерал захираларни JORC стандартлари асосида баҳолаб бераётгани, яқинда Knauf компанияси томонидан Тошкентда жойлашган Технопаркдаги бир корхонани сотиб олиш жараёни якунланаётгани маълум қилинди.
Германия Федератив Республикасининг Ўзбекистон Республикасидаги мухтор элчиси Тило Клиннер Германия Халқаро ҳамкорлик жамияти (GIZ) бундай кейин ҳам техник кўмак беришга тайёр эканлигини билдирди ва бугунги учрашувнинг асосий мақсадларидан бири бу хусусийлаштириш дастурини Германия бизнес вакилларига етказиш эканлиги, жорий йил 18 январь куни 3 ҳафтага Германияга хизмат сафарига кетаётгани, у ерда Германия иқтисодиёти Шарқий қўмитасининг йиллик йиғилишида иштирок этишини маълум қилди.
Шунингдек, Шарқий қўмитанинг йиллик йиғилишида Германия бизнес соҳа вакилларини Ўзбекистонда амалга оширилаётган хусусийлаштириш жараёнига жалб қилиш ниятида эканлиги ва бунда Ўзбекистонда сотилиши белгиланган активлар, жумладан, транспорт, логистика, калий ва минерал ўғитлар билан шуғулланадиган корхоналар, MobiUz ва бошқа корхоналар тўғрисида тақдимотлар намойиш этишини таъкидлаб ўтди.
