Qalampir.uz итернет нашрида 3 май – Жаҳон матбуоти эркинлиги куни муносабати билан «Ўрага сичқон тушди, гулдур-гуп ёхуд “ошкоралик ниқоби” ортидаги “шеп”лар» мавзусидаги мақоласида “Қайси идора ёки амалдор бугунги сўз эркинлиги даврида ҳамон ОАВга ёпиқлигича қолмоқда?” саволига журналист Азиза Қурбонова томонидан “Билишимча, Давлат активларини бошқариш агентлиги журналистлар ва матбуот учун мутлақо ёпиқ. Битта ҳам брифинг ўтказмайди” деб айтиб ўтилган.

Жорий йилнинг ўтган 4 ойи мобайнида Давактив агентлиги томонидан 2 та брифинг ўтказилди (батафсил маълумот ҳаволада). Жумладан, март ойида “Электрон онлайн-аукционларни ташкил этиш маркази фаолияти” ҳақида ва апрель ойида “Тўловга қобилиятсизлик тўғрисидаги Қонуннинг мазмун-моҳияти” мавзусида брифинглар ташкил қилинди.

Шу билан бирга, март ойида Давактив агентлиги директори ўринбосари Б.Ш. Усмонов “Тошкент халқаро инвестицион форуми”да маъруза билан иштирок этди ва форум доирасида журналистларни қизиқтирган саволларига жавоб берди. Бундан ташқари, “Ўзбекистон” телеканалидаги “Муносабат” кўрсатуви ва “Ўзбекистон” радиосидаги “Бу куннинг мавзуси” эшттиришида Давактив агентлигининг масъул ходимлари иштирок этди.

Давлат активларини бошқариш агентлиги томонидан ОAВ вакиллари учун доимий равишда Республика бўйлаб пресс-турлар ташкил этиб келинмоқда. Жорий йил бошидан шу кунга қадар 4 та пресс-турлар ташкил қилинди. Жумладан, Қорақалпоғистон Республикаси, Жиззах, Андижон ва Самарқанд вилояларидаги сотилиши режалаштирилган ва корпоратив бошқарув жорий этилган корхоналарда пресс-турлар (батафсил маълумот ҳаволада) ўтказилиб, ОАВ вакилларини қизиқтирган барча саволларига жавоб олинган.

Шу билан биргаликда,  Давактив агентлиги томонидан 2021 йил давомида 6 та пресс-тур, 3 та брифинг, 3 та матбуот анжумани, “Ўзбекистондаги давлат корхоналарини хусусийлаштириш ва трансформация қилиш дастурига  бағишланган форум” ташкил этилганлиги, ҳамда 2021 йил 29 сентябрда Тошкент шаҳрида ўтказилган “Ўзбекистон иқтисодий форуми 2021” тадбири доирасидаги панель муҳокамасида Давактив агентлиги директори маъруза билан иштирок этгани маълум қилинади (батафсил маълумот ҳаволада).

Бундан ташқари, Давактив агентлиги томонидан шаффофлик ва очиқлик тамойилларига амал қилган ҳолда ўзининг веб-сайти ва ижтимоий тармоқларидаги каналларида барча янгилик ва эълонлар мунтазам жойлаштириб келинади. Жумладан, 2021 йилда “davaktiv.uz” расмий сайтида 264 та янгилик, 142 та мақола ва 12 та реклама роликлари, 2022 йилда эса 73 та янгилик, 36 та мақола ва 3 та реклама роликлари жойлаштирилган.

Бугунги кунда Давактив агентлигининг “E-AUKSION” телеграм каналида 57 мингдан ортиқ ва “Давлат активларини бошқариш агентлиги” телеграм каналида 5 мингга яқин рўйҳатдан ўтган кузатувчилари мавжудлигини қўшимча равишда маълум қиламиз.

Давактив агентлиги фаолияти билан қизиқганингиз учун миннатдорчилик билдирамиз. Шу билан бирга, очиқлик доирасида олиб борилаётган фаолиятимизни расмий ахборот каналларимиз орқали кузатиб боришингизни тавсия этамиз.

2021 йилда амалга оширилган тарғибот ишлари

2022 йилда амалга оширилган тарғибот ишлари