Joriy yilning 7-sentyabr sanasida moliyaviy bozorlar boʻyicha biznes konferensiyalarning yetakchi provayderi Cbonds-Congress va Investitsiya institutlari milliy uyushmasi tomonidan mamlakatimiz Kapital bozorini isloh qilish va uni jadal rivojlantirish istiqbollari muhokamasiga bagʻishlangan “Oʻzbekiston Respublikasi Kapital bozori” V xalqaro konferensiyasi tashkil qilindi.
Anʼanaga aylangan mazkur konferensiya kapital bozorini tartibga soluvchi masʼul organlar, mahalliy banklar, investitsiya va ishlab chiqarish kompaniyalari, shuningdek, xalqaro moliya institutlari, reyting agentliklari hamda koʻplab ushbu soha ekspertlarini bir maqsadda birlashtirdi.
Mazkur tadbirda Davaktiv agentligi direktori oʻrinbosari Alisher Miraliyev ishtirok etib, oʻz maʼruzasida shaffof va raqamli tizim faoliyatiga oʻtish yoʻlida Davlat korxonalarining faoliyati toʻgʻrisidagi yigʻma hisobotni har yili oshkor qilish amaliyoti joriy etilganligi, endilikda, davlat ishtirokidagi korxonalarning kuzatuv kengashi aʼzoligiga nomzodlarni qabul qilish va davlat korxonalari rahbarlarini tayinlash tanlov asosida amalga oshirilishi haqida taʼkidlab oʻtdi.
Shu bilan birga, mustaqil Oʻzbekiston tarixida ilk bor, davlat ishtirokidagi korxonalarni boshqarishning fundamental huquqiy asosiga aylangan “Davlat mulkini boshqarish toʻgʻrisida”gi Qonunni qabul qilinganligi, qolaversa, korporativ boshqaruv yoʻnalishida muhim ahamiyatga ega yangi tahrirdagi korporativ boshqaruv qoidalari, axloq kodeksi va boshqa bir qator hujjatlar xalqaro ilgʻor tajribalar, shu jumladan Iqtisodiy hamkorlik va taraqqiyot tashkilotining korporativ boshqaruv rahbarlik tamoyillari asosida ishlab chiqilganligi hamda amaliyotga joriy etilganligini maʼlum qildi.
Bundan tashqari, mamlakatimiz iqtisodiyotida davlat ishtirokini qisqartirish, bunda xususiylashtirish dasturi va uni amalga oshirish boʻyicha qilinayotgan islohotlar bilan konferensiya qatnashchilari batafsil tanishtirildi.
Tadbirda ishtirokchilar tomonidan xususiylashtirish sohasida amalga oshirilayotgan keng qamrovli islohotlar va erishilayotgan natijalar mamlakat kapital bozorini jadal rivojlantirish yoʻlida mustahkam poydevor boʻlib xizmat qilishiga ishonch bildirildi.
