Ўзбекистон Республикаси Президентининг 2019 йил 9 январдаги “Жамиятда ҳуқуқий онг ва ҳуқуқий маданиятни юксалтириш тизимини тубдан такомиллаштириш тўғрисида”ги ПФ-5618-сон Фармонида ҳамда ушбу фармон ижроси бўйича Вазирлар Маҳкамасининг 2022 йил 16 майдаги 259-сон қарорига мувофиқ, Давлат органлари ва ташкилотларида ходимларнинг меҳнат ҳуқуқи, ҳуқуқбузарликларнинг олдини олиш, шартномалар ва мурожаатлар билан ишлаш бўйича билимларини кучайтиришга қаратилган “Коррупцияга қарши курашиш ойлиги”ни ўтказиб бориш белгиланган.
Шу билан бирга, Давлат активларини бошқариш агентлигининг “2022 йил II ярим йил учун Иш режаси”да ҳам “Коррупцияга қарши курашиш ойлиги” ўтказилиши кўзда тутилган.
Жорий йилнинг 24 ноябрида ўтказилган “Коррупцияга оид ҳуқуқбузарликлар учун жавобгарлик” мавзудаги семинар-тренингда Ўзбекистон Республикаси Бош прокуратураси катта прокурори Каримжон Мусашайхов ва Коррупцияга қарши курашиш агентлигининг етакчи инспектори Саидакмал Юлдашевлар иштирок этиб, Агентлик ходимларининг коррупцияга қарши курашиш борасидаги билим ва кўникмаларини янада ошириш, коррупцияга нисбатан қатъиятлилик билан биргаликда курашиш лозимлигига эътибор қаратдилар.
Таъкидлаш жоизки, бу йўналишда олиб борилаётган ислоҳотлар фуқаролар томонидан фаоллик билан қўллаб-қувватланган тақдирда, кўзланган натижага эришиш мумкин. Шундай экан, семинарда коррупцияга қарши курашишда жамоатчилик назоратини кучайтиришимиз зарурлигига, бунда коррупцияга қарши курашиш фаолиятининг мақсади коррупцияга бошловчи хатти-ҳаракатларни амалга оширишга шароит яратиб берувчи ҳолатларни бартараф қилишга, унинг олдини олиш чораларини кўрган ҳолда ҳаракат қилиш лозимлигига урғу берилди.
Шу билан бирга, Давактив агентлиги вазирлик ва идоралар ўртасида иккинчи бўлиб коррупцияга қарши курашиш бўйича халқаро ISO 37001:2016 стандарти сертификатини қўлга киритганлиги алоҳида таъкидлаб ўтилди.
Маълумот учун: ISO 37001:2016 - бу ташкилотда коррупцияга қарши самарали тизимни яратиш учун халқаро моделни ўз ичига олган дунёдаги биринчи халқаро стандарт ҳисобланади. Мазкур сертификатни олиш орқали ташкилот инвесторлар, тадбиркорлар, давлат ҳокимияти органлари ва бошқа манфаатдор томонларга жараёнларни шаффоф, қонуний ва жаҳоннинг илғор тажрибаларига мос равишда ўтказишни юқори даражада намойиш этади.
Семинар – тренингда ходимлар ўзларини қизиқтирган барча саволларига мутахассислар томонидан жавоблар олдилар.
